ons beskik nie oor die kennis
van wat werklik daarbuite
en everywhere
en oral bestaan nie
maar twyfel
in die bestaande verhale
oor gode

pertinent ingeprent
weens toevallige geboorte in 'n volk
van waar god geërf
voortgeplant
en gevleg word
met volksidentiteit

verhinder ons nie
om uit te werk
wat goedheid is
en dit almal te gun nie

ons weet wel
dat vele hard glo
dat hulle die onweetbare
verseker weet
al is hul geloofwaarheid
in direkte teenstrydigheid
met die hardgelowigheid
van die volgende kalant
en nog 'n derde
vierde,
vierduisend
miljoen
en sestig
met dieselfde
of selfs verhewe
selfversekerde kennis
dat hulle die enigste ware punt beet het
alkant omsingel
deur onbewysbaarheid

elke god 'n nommer op 'n loterybal
sterkte met jou keuse
die trekking geskied
met uitskeityd

waarom so bang
om met twyfel te leef
van bloot erken jy weet nie
voor jy die onwaarskynlike
as waarheid aangryp

oor hoeveel vryheid beskik ons werklik
om god te weeg en oorweeg
en aan bewyse te meet
as die skuldlas van godsdiens
volksgewoonte is
by geboorte geërf
van vaders by voorvaders aangeleer
wat lank terug die nageslag
in 'n god in vasbesluit het
wat dit sonde verklaar
om sy woord te betwis

of is dit juis die getalle

van die misleides

wat die valse berusting bring
omdat soveel ander
dieselfde glo

sê my wat is die kantelpunt
wanneer word

spekulasie die waarheid

'n duisend
miljoen
miljard

hoe groot ook al die getal
meer mense glo jy is verkeerd

my geloof is versoenbaar
met elke geloof

ek erken
aanvaar
en weet
vir seker
elke geloof
is 'n geloof

daarteenoor
bied die gekose geloofde geloof
sy gelowige
minder objektiwiteit
oor sy eie geloof
se geloofwaardigheid

tog leef die twyfelende ongelowige
met relatiewe sekerheid
gemeet aan die versekerde gelowige
se onsekerheid
wat hom motiveer
om sy bedenklike geloofsbeleid
te versprei
na selfone wêreldwyd
twaalf môndjies vol

wonder wie
die boodskap
moet ontvang

die sender
of die versuurder