optrede uit vrees vir tug is selfbehoud
egoïsties van aard
goeie dade gedaan
om die hel te vermy
val in die kategorie
van selfsugtigheid

om moreel goed te wees
moet goedheid geen loon verwag nie

toevallige wins
en meevallende geluk
is 'n bonus om te geniet
bypassende onverwagse geluk
word gereeld deur goedheid aangetrek

en dis goed

wie afgunstig is
op die welvaart van 'n mens
wat geluk versprei
kan gerus stop
en leer
uit die voorbeeld
wie weet
miskien spruit iets goeds vir jou
omdat jy iets goeds 'n ander gun

maar goed
kan
sleg wees

wanneer goed
slegs aangewend word
om beloning
na te jaag
wanneer goed
slegs gebeur omdat iemand kyk
word die kwaadaardige kortpad
te maklik gevat
deur die mees gesiene weldoener
as uit berekeninge blyk
hy kan daarmee wegkom
omdat almal wat saak maak
se oë elders is
dan is niksdoen beter
as goed doen
om gesien te word

die allerbeste egter
is wanneer goedheid
vir goedheidsonthalwe
gewoonte geword het

dit verg 'n groter besluit
om goed te wees
ongeag die geleentheid
dit is goedheid
for goodness' sake

uit vrees spruit
die immoraliteit

watter goed is beter

goeie dade uit vrees vir straf

of goed for goodness' sake of

vermy mens die vraagstuk
wees alles gelyk

wees goed uit liefde

wees net goed

sonder om god
se aandag te soek

wees goed genoeg
om vir die kere wanneer
jy nie goed was nie
te vergoed

wees goed vir jouself

kies liefde bo vrees
wanneer jy bid

die dood bring verlossing
vir almal

geloof of te not

dieselfde stilte
waarin ons was
voor ons tyd