ek vind dit onnodig
om ander te oortuig
van enige van my oortuigings
my gevoel is

natuur is reeds perfek
soos dit is

ongeag ons gevoelens
oor hoe ons dit anders
sou wou hê

my sienings is gesprekke
wat ek voer in my kop
omdat my gaste
so ver vasgekluister
in hul eie huise sit
dalk slegs neergepen
soos ek gesê het
om myself te oortuig

jy wat gebly het
tot hier
dankie

ek oordryf as ek sê
die woorde het my
van 'n gewisse besetenheid gered
hoop dat jy ook
'n waarde daaruit geput het

miskien hou jy min van wat ek sê
in welke geval
slaan seblief hierdie boek toe
voor jy by hierdie punt uitkom

ek vermoed jy het my
alreeds voorgespring
en nog nooit
hierdie boek beblaai nie
nie eers opgedaag
om hierdie gedagtes te kontempleer nie
hierdie woorde doodluiters
agtergelaat
geïgnoreer
en goed gefunksioneer daarsonder
soos almal anders
wat weggebly het
om die boom
ongesiens
op sy eie
in die woud
nie te hoor val nie

hierdie is immers
die onpopulêre opinie

ek skryf nie hierdie
om snaaks te wees nie

dis wat ek werklik glo

want
selfs die ongelowige
glo in iets